Gjemnes mållag og kulturavdelinga i kommunen inviterer til ein skikkeleg innhaldsrik og variert kulturkveld. Det blir besøk av forfattar Sunniva Relling Berg (sjå meir info under), bokslepp av Du mitt Nordmøre og Gjemnesminne, musikalske innslag av “Mål med Meining” og Gjemneskoret, loddtrekning med fin-fine gevinstar, kaffeslabberas og matsal.
Kom og få servert både litteratur og musikk, "graut og bakels" og moglegheit for bokkjøp til julegåver. Perfekt å bruke ein mørk novemberkveld til sosialt samvær og kulturelt påfyll!
Og alt dette med gratis inngang på Batnfjord samfunnshus!
OM FORFATTAR SUNNIVA RELLING BERG
Sunniva Relling Berg (f. 1988) kjem frå Ålesund. Ho debuterte i 2011 med den kritikarroste ungdomsromanen Utfor, som blei nominert til Brageprisen. Ho har seinare gitt ut romanane Beina i gitaren (2013), Polarnatt (2019) og Soldagen (2024) for ungdom. I 2021 kom Lyden av to hender, hennar fyrste roman for vaksne.
Då Sunniva Relling Berg skreiv «Lyden av to hender» måtte ho reise i både tid og geografi til Ungarn under kommunismen. Det var mange år med research og turar til Ungarn. Med bilder og utdrag frå boka fortel ho om denne prosessen.
Lyden av to hender handlar om å tørre følgje draumane sine, om korleis det kjennest når livet ikkje blir heilt slik du hadde trudd – og om å ikkje ta inn alle stemmer, men heller forstå at eiga stemme er verdt å lytte til. Boka handlar òg om kunsten sine tronge kår i Ungarn i forlenginga av Sovjetunionen og mangel på ytringsfridom. Eit tema som diverre ikkje har blitt mindre aktuelt ettersom krigen i Ukraina utviklar seg. I arbeidet med boka fekk ho ei større forståing av at vi blir prega av landa vi veks opp i og at det er lett å gå seg vill. Viktige tema i boka er sensur, spionasje og kven eig sanninga. Sunniva vil også snakke om skriveprosessen og kvifor ho valte å skrive på nynorsk, etter å ha vakse opp med bokmål.
