Gjemnes mållag og kulturavdelinga i kommunen inviterer til ein skikkeleg innhaldsrik og variert kulturkveld. Det blir litterær samtale mellom forfattar Marit Eikemo og Siri Ohren frå kulturavdelinga (sjå meir info under), bokslepp av Du mitt Nordmøre og Gjemnesminne, musikalske innslag av “Mål med Meining” og Gjemneskoret, loddtrekning med fin-fine gevinstar, kaffeslabberas og matsal.
Kom og få servert både litteratur og musikk, "graut og bakels" og moglegheit for bokkjøp til julegåver. Perfekt å bruke ein mørk novemberkveld til sosialt samvær og kulturelt påfyll!
Og alt dette med gratis inngang på Batnfjord samfunnshus!
OM FORFATTAR MARIT EIKEMO
Marit Eikemo (f. 1971) er frå Odda og bur i Bergen. Ho har tidlegare arbeidd som tidsskriftredaktør, festivalsjef for Litteratursymposiet i Odda, forlagsredaktør og leiar for Cornerteatret i Bergen. Eikemo debuterte i 1999 med intervjuboka Her, no. Møte med unge menneske. Hennar første roman, Mellom oss sagt, kom i 2006. Eikemo har til saman gitt ut sju romanar, den seinaste er Vi er brødrene Eikemo (2024). Ho har også skrive essayboka Samtidsruinar og novellesamlinga Hardanger.
Marit Eikemos bøker er både smarte og underhaldande, og har imponert både kritikarar og publikum med sine presise observasjonar av det norske samfunnet og tida vi lever i. Ho mottok Amalie Skram-prisen 2017 for sin forfattarskap, og var festspeldiktar på Dei nynorske festspela 2018. I 2019 mottok ho Samlagsprisen.
OM LITTERÆR SAMTALE
Tema for den litterære samtalen (bokbadet) vil vere med hovudvekt på den nyaste boka Vi er Brødrene Eikemo, men også litt innom tidlegare bøker som feks novellesamlinga Hardanger, om sjølve skriveprosessen og korleis ho arbeider. Forfattaren vil ha litt høgtlesing av utdrag frå boka.
